‘बाढीपीडितलाई हरिबिजोग बनाएर कस्तो चाडपर्व ?’ सरकारमाथि प्रभु साहको कडा प्रहार

आम जनता पार्टी (आजपा)का अध्यक्ष एवं पूर्वमन्त्री प्रभु साहले भोटेकोशी बाढीपीडितसहित देशभरका बाढी तथा प्राकृतिक विपद्का पीडितलाई तत्काल राहत उपलब्ध गराउँदै पुनर्निर्माणको काम अघि बढाउन छुट्टै प्राधिकरण गठन गर्न सरकारसँग माग गरेका छन् ।

दशैं, दीपावली, छठलगायतका चाडपर्वको अवसरमा आजपा काठमाडौं उपत्यका विशेष कमिटीले शनिबार काठमाडौंको कोटेश्वरस्थित पार्टी कार्यालयमा आयोजना गरेको शुभकामना आदानप्रदान कार्यक्रममा शुभकामना सन्देश दिदै अध्यक्ष साहले बाढीपीडितको अवस्था अझै पनि दयनीय रहेको भन्दै उनीहरूको पीडालाई बेवास्ता गरेर चाडपर्व मनाउन नसकिने बताएका हुन् ।

आजपा अध्यक्ष साहले भने, “बाढीपीडितको अवस्था विजोग छ । बाढीपीडितलाई हरिबिजोग बनाएर कस्तो चाडपर्व हुन्छ ?” उनले विपद्मा परेका नागरिकलाई राज्यले अभिभावकत्व प्रदान गर्नुपर्ने भन्दै राहत वितरणसँगै क्षतिग्रस्त संरचनाको पुनर्निर्माणका लागि प्रभावकारी र दीर्घकालीन योजना बनाउन सरकारको ध्यानाकर्षण गराए ।

उनले भोटेकोशी बाढीबाट प्रभावित नागरिकसहित देशका विभिन्न क्षेत्रमा बाढी, पहिरो तथा अन्य प्राकृतिक विपद्बाट प्रभावित परिवारको पुनस्र्थापना र पुनर्निर्माणलाई प्राथमिकतामा राख्नुपर्ने बताए । तत्काल राहत, क्षतिको मूल्यांकन, सुरक्षित पुनस्र्थापना तथा भौतिक संरचनाको पुनर्निर्माणलाई एउटै योजनाअन्तर्गत अघि बढाउन अधिकारसम्पन्न प्राधिकरण गठन गर्नुपर्ने माग उनले सरकारसंग गरे । 

अध्यक्ष साहले चाडपर्वको समयमा बजारमा हुने महँगी, कालोबजारी र मनपरी मूल्यवृद्धि नियन्त्रण गर्न सरकार असफल भएको आरोपसमेत लगाए । नागरिकले चाडपर्व मनाउने समयमा दैनिक उपभोग्य वस्तुको सहज उपलब्धता र उचित मूल्य सुनिश्चित गर्नुपर्ने भए पनि सरकारले त्यसतर्फ प्रभावकारी अनुगमन गर्न नसकेको उनले बताए ।

विशेषगरी चाडपर्वका बेला खाना पकाउने ग्यास तथा घरायसी प्रयोजनमा प्रयोग हुने विभिन्न सामग्रीको सहज उपलब्धता सुनिश्चित गर्न सरकार गम्भीर बन्नुपर्ने साहको भनाइ छ । बजारमा कृत्रिम अभाव सिर्जना गर्ने, कालोबजारी गर्ने र उपभोक्तामाथि मनपरी मूल्य थोपर्ने प्रवृत्तिमाथि कडाइका साथ निगरानी गर्न उनले सरकारसँग आग्रह गरे ।

साहले चाडपर्वका नाममा अत्यावश्यक सार्वजनिक सेवा अवरुद्ध हुन नहुनेमा पनि जोड दिए । शान्ति सुरक्षा, स्वास्थ्य, विद्युत्, खानेपानी, सञ्चारलगायतका अत्यावश्यक सेवा २४सै घण्टा सञ्चालन हुने व्यवस्था मिलाउन सरकारको ध्यानाकर्षण गराउँदै उनले नागरिकको जीवनसँग प्रत्यक्ष जोडिएका सेवामा चाडपर्वको प्रभाव पर्न दिन नहुने बताए ।

“दशैं, दीपावली वा छठका नाममा अत्यावश्यक सेवा बन्द गर्न मिल्दैन,” आजपा अध्यक्ष साहले भने, “स्वास्थ्य सेवा र शान्ति सुरक्षा २४सै घण्टा सुनिश्चित हुनुपर्छ ।”

चाडपर्वका बेला ठूलो संख्यामा मानिस आवतजावत गर्ने भएकाले शान्ति सुरक्षालाई थप प्रभावकारी बनाउनुपर्ने उनले बताए । विशेषगरी बढी भिडभाड हुने धार्मिक तथा पर्यटकीय स्थलमा सुरक्षा व्यवस्था मजबुत बनाउन, सार्वजनिक यातायातलाई व्यवस्थित गर्न तथा नागरिकको आवागमन सहज बनाउन सरकार र सुरक्षा निकायले विशेष योजना बनाउनुपर्ने साहको भनाइ छ ।

उनले सार्वजनिक यातायातमा हुने मनपरी भाडा असुली तत्काल नियन्त्रण गर्नसमेत माग गरे । चाडपर्वको समयमा यात्रुको चाप बढ्ने मौका छोपेर यातायात व्यवसायीले मनपरी भाडा लिने तथा यात्रुलाई दुःख दिने अवस्था आउन नदिन प्रभावकारी अनुगमन र कारबाही आवश्यक रहेको उनले बताए ।

त्यस्तै, राजमार्ग तथा मुख्य सडकमा हुने अवरोध तत्काल हटाउने व्यवस्था मिलाउनुपर्नेमा पनि साहले जोड दिए । बाढी, पहिरो वा अन्य कारणले सडक अवरुद्ध भएमा यात्रु तथा सर्वसाधारण लामो समयसम्म अलपत्र पर्ने अवस्था आउन नदिन सम्बन्धित निकायलाई चौबीसै घण्टा तयारी अवस्थामा राख्नुपर्ने उनले बताए ।

साहले चाडपर्वलाई सुरक्षित, सहज र व्यवस्थित बनाउन ट्राफिक व्यवस्थापनमा पनि विशेष ध्यान दिनुपर्ने बताए । मुख्य सडक तथा राजमार्गमा ट्राफिक चेकजाँचलाई प्रभावकारी बनाउँदै दुर्घटना न्यूनीकरण, सवारी आवागमन व्यवस्थापन तथा यात्रुको सुरक्षालाई प्राथमिकतामा राख्न उनले सरकारसँग आग्रह गरे ।

उनले विद्युत् आपूर्ति, खानेपानी, सञ्चार तथा आकस्मिक उद्धार र राहतजस्ता सेवामा कुनै समस्या आउन नदिन सम्बन्धित निकायलाई तयारी अवस्थामा राख्नुपर्ने बताए । चाडपर्वका बेला कुनै पनि स्थानमा आपतकालीन अवस्था सिर्जना भए तत्काल उद्धार तथा राहत पु¥याउने संयन्त्र सक्रिय हुनुपर्ने उनको भनाइ छ ।

अध्यक्ष साहले चाडपर्वलाई केवल उत्सवको रूपमा नभई विपद्मा परेका नागरिकको पीडा सम्झने अवसरका रूपमा पनि लिनुपर्ने बताए । राज्यले सबै नागरिकलाई समान रूपमा हेर्दै विपद्पीडित, गरिब तथा विपन्न परिवारको जीवन सहज बनाउनेतर्फ विशेष ध्यान दिनुपर्ने उनको भनाइ थियो ।

उनले देशभरका नागरिकलाई दशैं, दीपावली तथा छठलगायतका पर्वको शुभकामना दिँदै चाडपर्वका समयमा सरकारलाई नागरिकको सुरक्षा, सेवा र सहजताका विषयमा संवेदनशील बन्न आग्रह गरे । 

 

आजपा काठमाडौं उपत्यका विशेष कमिटीका अध्यक्ष पासाङ तामाङको अध्यक्षतामा भएको कार्यक्रममा आजपा सहअध्यक्ष तिलक थापामगर, उपाध्यक्ष धनकुमारी मगर, महासचिव त्रिभुवन साह, उपमहासचिव देवी पण्डित रेग्मी, प्रवक्ता सुभाष साह, सचिव बिजय यादव लगायतको सहभागिताका रहेको कार्यक्रमका सञ्चालक एवं उपत्यका विशेष कमिटी सचिव रवि ध्वज कार्कीले जनाएका छन् ।